«Կխանգարեն մյուսների հանգիստը». Հաշմանդամություն ունեցող երեխաներին թույլ չեն տվել մտնել Ջրաշխարհ

  • Aug 06, 2023

Ֆեյսբուքյան օգտատեր Հասմիկ Սողոմոնյանը իր էջում հրապարակել է հաշմանդամություն ունեցող մի խումբ երեխաների լուսանկար՝ կից գրառմամբ հայտնելով, որ երեխաների մուտքը Ջրաշխարհ արգելել են.

«Այս հրաշք խումբն այսօր Վանաձորից հասել էր Երևան։ Խմբի ցանկությունը մեկն էր` մտնել ջրաշխարհ, սրտի թրթիռով կտրել-անցել էին երկար ճանապարհ ու հույս-հավատով, որ իրենք էլ բոլորի պես հավասար իրավունքներ ունեն, բայց, արի ու տես, փակ էր Ջրաշխարհի դռները իրենց առաջ։

Պատճառը ծիծաղելի, կխանգարեն մյուսների հանգիստը։

Ուր մնաց ներառականությունն ու հավասարությունը»,- գրել է Հասմիկ Սողոմոնյանը` դիմելով ՄԻՊ-ին:

Մարդու իրավունքների պաշտպան Անահիտ Մանասյանն արձագանքել է դեպքին ու գրառում կատարել.

«Այսօր՝ օգոստոսի 6-ին, սոցցանցերում տեղեկություն է տարածվել, որ Վանաձորից Երևան ժամանած հաշմանդամություն ունեցող մի խումբ երեխաների մուտքը «Ջրաշխարհ» ժամանցի կենտրոն առանց հիմնավորման արգելվել է: Պաշտպանն աշխատակազմին անմիջապես հանձնարարել է զբաղվել վերոնշյալ խնդրով: Իրականացվում են անհրաժեշտ միջոցառումներ ստեղծված իրավիճակի պատճառները պարզելու համար:

Մարդու իրավունքների պաշտպանը խիստ կարևորում է հաշմանդամություն ունեցող անձանց նկատմամբ ցանկացած խտրական վերաբերմունքի բացառումն ու հասարակության բոլոր անդամների համար  հավասար հնարավորությունների ապահովումը:

Սույն դեպքը գտնվում է Պաշտպանի անմիջական ուշադրության ներքո: Մանրամասների վերաբերյալ աշխատակազմը հանդես կգա լրացուցիչ հաղորդագրությամբ»:

 

Մեկնաբանություն

Որոնում