«Այդ ցավը չի անցնում»․ Մարիամ Ալեքսանյանը՝ հոր կորստից հետո կյանքի ամենածանր ճշմարտության մասին

Դերասանուհի Մարիամ Ալեքսանյանը հանդես է եկել խորապես հուզիչ ու անկեղծ գրառմամբ՝ անդրադառնալով հոր կորստից հետո իր ապրումներին և կյանքի փոփոխված իրականությանը։

Նա խոստովանում է, որ առանց հոր կյանքը չափազանց ծանր է, և այդ բացը միայն զգացմունքային չէ, այլ նաև իր լուրջ հետևանքներն ունի՝ ազդելով ինչպես հոգու, այնպես էլ կյանքի ամենակարևոր կողմերի վրա։

Մարիամի խոսքով՝ ցավը ժամանակի ընթացքում չի վերանում, ինչպես հաճախ ընդունված է մտածել։ Այն պարզապես դառնում է մարդու մի մասը․ մարդը չի դառնում ուժեղ, որովհետև այլևս չի ցավում, այլ սովորում է ապրել այդ ցավի հետ՝ այն կրելով իր ներսում ամեն օր։

Դերասանուհին նշում է, որ կյանքի այս փուլում մարդը ստիպված է վերաիմաստավորել իր դերը ընտանիքում։ Երբեմն ստիպված ես դառնում ոչ միայն քո, այլ նաև մյուսների համար հենարան՝ միաժամանակ ստանձնելով մի քանի դեր՝ ծնողի, քրոջ, եղբոր։

«Սկսում ես ոտքի կանգնել ու շարունակել…»,- գրում է նա՝ ընդգծելով, որ որքան էլ դժվար լինի, կյանքը չի կանգնում, և մարդը ստիպված է առաջ գնալ՝ իր մեջ կրելով այդ անդառնալի ցավը։

Մարիամ Ալեքսանյանի այս խոսքերը շատերի համար կարող են դառնալ մտորելու առիթ, քանի որ կորուստը մի փորձություն է, որի միջով անցնելիս յուրաքանչյուրը փորձում է գտնել իր սեփական ուժը ապրելու և շարունակելու համար։