«Միշտ ասում էր՝ սաղ տոչնի ա, դա իր բառն էր». Արցախում զոհված Արմանը ընտանիքի միակ տղան էր

«Միշտ ասում էր՝ սաղ տոչնի ա, դա իր բառն էր». Արցախում զոհված Արմանը ընտանիքի միակ տղան էր

168.am-ը գրում է․

Արցախում զոհված Արման Սարգսյանի 2020 թվականի հունվարի 10-ին էր զորակոչվել, նոյեմբերին կլրանար 19-ամյակը:

Արմանը Կոտայքի մարզի Լեռնանիստ համայնքից էր, ունի 2 քույր, 2-ն էլ ամուսնացած են, ինքը տան փոքրն էր, ապրում էր ծնողների և տատիկի հետ:

«Շատ բարի մարդ էր, բոլորին հասնող, ընկերասեր տղա էր… Դպրոցն ավարտել և ընդունվել էր Պոլիտեխնիկ, մեկ կիսամյակ սովորեց ու մեկնեց ծառայության: Կորոնավիրուսի պատճառով դեռ արձակուրդ չէր եկել, բայց երբ զանգում էր, միշտ ասում էր՝ սաղ տոչնի ա, դա իր բառն էր»,- 168.am-ի հետ զրույցում ասաց Արմանի քրոջ ամուսինը՝ Ռազմիկը:

Արմանը նաև քեռի էր, փոքր քույրը 2 աղջիկ ունի, մեծը 3 տարեկան է, շատ կապված էին իրար հետ: Բանակում եղած ժամանակ էլ տեսազանգով խոսել էր ընտանիքի անդամների հետ, տեսել երեխաներին:

«Ամսի 12-ին աղջիկս խոսեց Արմանի հետ, ընդամենը 2 բան ասաց՝ քեռի, զգույշ կլինես, մեկ էլ հարցրեց՝ հո ձուն չի՞ այդտեղ: Մինչև հիմա երեխան ասում է, որ քեռուն շատ է կարոտել»,- պատմեց Արմանի քրոջ ամուսինը:

Արմանը զոհվել է հոկտեմբերի 13-ին, հարազատները բոթը լսել են դեպքից 2 օր անց.

«Մինչև ամսի 13-ն ամեն օր զանգում էր, բոլորիս հետ էլ խոսում էր՝ իմ, քույրերի, ծնողների, բայց վերջին անգամ հոր հետ է խոսել, ասել է՝ լավ ա սաղ: Պատերազմը որ նոր էր սկսվել, հույս էր տալիս մեզ, ասում էր՝ մենք շատ հեռու ենք, մեր մոտ կռիվ չկա, նորմալ է: Մեծ քրոջ հետ որ խոսել էր, ասել էր՝ քուր, որ իմանաս՝ ինչ ձև վաևատ եմ անում այստեղ, կզարմանաս…»:

Արման Սարգսյանին հուղարկավորել են հոկտեմբերի 17-ին՝ Լեռնանիստ համայնքում:

Մեկնաբանություններ